Stari er þéttvaxinn, dökkur spörfugl, á stærð við skógarþröst og býr í nábýli við manninn.

Starinn flýgur beint, blakar vængjunum hratt eða lætur sig svífa og er auðþekktur á fluglagi og lögun. Hann syngur á setstað með lafandi eða skjálfandi vængi og úfnar hálsfjaðrir, einnig á veturna.

Hann situr hnarreistur og hleypur eða gengur á jörðu niðri en valhoppar ekki eins og þrestir.

Er ávallt félagslyndur og oft í stórum hópum við náttstaði.

Fæða: Skordýr, ormar, sniglar og ber.